Ausilio komenton rinovimin e Icardit dhe zërat mbi Asamoah
Pak minuta para fillimit të sfidës Inter-Benevento, Drejtori Sportiv i zikaltërve foli për situatën e vështirë që po kalon skuadra në 10 javët e fundit.
“Është e vërtetë, që situate nuk është aspak e mirë, por dua të theksoj se të gjithë te Interi jemi të bashkuar për të kaluar këtë situatë. Lojtarët janë stërvitur të bashkuar dhe ne drejtuesit u kemi qëndruar pranë, për të kaluar këtë moment”, tha Ausilio.
Wanda Nara ka deklaruar se për Icardin interesohen disa skuadra, mes të cilave edhe 2 big europianë. Gjithashtu mediat italiane raportojnë se Interi po negocion edhe me mbrojtësin e majtë të Juventusit, Asamoah, kontrata e të cilit me bardhezinjtë përfundon në fund të sezonit.
“Me Icardin dhe Wandën jemi në kontakt të vazhdueshëm dhe do t’i bëjmë gjërat në kohën e duhur. Normalisht që çdo gjë duam ta bëjmë në heshtje, sepse sa më shumë bujë, aq më shumë komplikohet situate. Asamoah është një lojtar i Juventusit dhe nuk më pëlqen të flas për lojtarë të skuadrave të tjera”, deklaroi Ausilio.
Interi për herë të parë që nga fillimi i kampionatit përfundoi jashtë zonës Champions, por duket se Ausilio nuk është i shqetësuar për momentin.
“Të gjithë e dimë që po kalojmë një moment negative, por unë kam besim te skuadra dhe Spalletti. Të gjithë bashkë besoj se do t’ia dalim të realizojmë objektivin”, deklaroi Ausilio.
