Bekim Isufi: Suksesin e Dritës do ta mbaj mend gjatë
Trajneri i Dritës, Bekim Isufi u shfaq tepër i emocionuar pak pasi skuadra e tij u shpall kampione e Vala e Superligës së Kosovës. Sipas tij, Drita dhe i gjithë qyteti i Gjilanit e kanë merituar titullin.
“Janë emocionet e para, janë të përziera, sepse ka qenë një finale. Normalisht jam shumë i kënaqur. Mendoj se Drita e ka merituar të shpallet kampion. Të mos harrojmë një gjë: të gjitha ekipet kanë bërë konkurrencë dhe ka pasur rivalitet të madh deri në fund. Mendoj se i gjithë qyteti i Gjilanit e ka merituar suksesin, ishim përgatitur për këtë arritje. Më vjen mirë që edhe Gjilani ka siguruar qëndrimin dhe do të kemi sërish derbi në Vala Superligën. Do ta mbaj mend gjatë këtë sukses.
I pyetur për atë që pret Dritën në pjesëmarrjen e parë në Champions League, Isufi i përgjigj.
Duhet të ulemi të bisedojmë, sepse nuk kemi patur mundësi sa ç’duhet për të folur për pjesëmarrjen eurooiane. Mendoj se të gjithë këta lojtarë do të jenë pjesëmarrës në Europë. Duhet të shohim me kujdes se ku duhet të përmirësohemi. Le ta shijojmë një herë këtë sukses. Drita ka potencial, por duhet të bëhen 2-3 ndërhyrje. Të shpresojmë të kalojmë raundin e parë, pastaj kuptohet që ekipet janë shumë më të forta, sado që të përforcohesh, mbetet shumë e vështirë.
