Surprizon Kastrioti, një penallti fundos Luftëtarin
Nga Skënderbeu te Kastrioti vendos sërish një 11-metërsh dhe me takimin e dytë të edicionit të 80-të të Superiores, që u mbyll 0-1 pas një goli të shënuar nga pika e bardhë, vetëm se këtë herë për miqtë. Krutanët bënë surprizën e madhe në Gjirokastër duke debutuar me pikët maksimale për më tepër në transfertë teksa treguan dhe një futboll cilësor, përballë një Luftëtari që dukej një kushëri i largët i skuadrës dëfryese të një viti më parë. Temperaturat e larta ndikuan në paraqitjen e skuadrave sidomos në fillimin e ndeshjes, ku pjesa e parë ishte disi e ngadaltë, ku Luftëtari i Milos Kostic të paktën në debutim u duk sikur kishte humbur disi shkëlqimin e një viti më parë, pavarësisht se aksioni i minutës së 5-të krijonte shpresë. Në të 12-tën bluzinjtë pretenduan dhe për një 11 metërsh por kryesori vazhdoi lojën. Rastin e parë Kastrioti e krijoi në të 37-tën me një goditje nga larg të Rahimit, që u ndal në dy kojhë nga Ruci, ndërsa pak caste më pas Shkurtaj kishte me kokë shansin më të mirë të ndeshjes por nuk shënjestroi sic duhet portën. Pjesa e dytë kishte më tepër ritëm me Kastriotin që pati menjëherë një pretendim për 11-metërsh, teksa goditja e Cutrës u prit mrekullisht nga Ruci, por në përpjekjen e dytë të Rahim Rapa ndali topin teksa po i drejtohej portës. Për krutanët me dorë, për kryesorin jo teksa pas konsultimit me anësorin akordoi goditje këndi. Ishin minuta më tëmira për miqtë, me Rucin që brenda 4 minutash arriti të evitojë 3 herë golin. Gjithsesi në të 68-tën Kastrioti ndërtoi aksionin që ndryshoi ndeshjen, me Bardhin që u pengua në zonë nga Janicic duke fituar 11-metërsh për të tijtë. Nga pika e bardhë Mziu nuk gaboi.
Reagimi i Luftëtarit ishte i dobët me mundësinë më të mirë që erdhi nëpërmjet një goditje dënimi në sekondat e fundit por që përfundoi jashtë. U mbyll 0-1 për Kastriotin me formacionin e Plorit që e nis me këmbën e mbarë Superioren duke treguar se nuk kërkon të jetë thjesht kalimtare mes më të mirave të futbollit shqiptar.
