L’Equipe gjen problemin te Marseille, është Kevin Strootman
Atmosfera tek Olimpique Marseille para takimit me Lazion, në Olimpico, për grupet e Europa League mbetet e zymtë. Humbja e fundit në fushën e Montpellier, në Ligue 1, e ka zbritur skuadrën e Rudi Garcias në vendin e gjashtë, duke e larguar nga zona Champions.
Sipas L’Equipe, ka një arsye të fortë për rezultatet e fundit negative e që lidhet me marrëdhëniet mes futbollistëve në dhomat e zhveshjes. Situata mund t’i dalë jashtë kontrollit trajnerit Garcia. Flitet për një xhelozi të lojtarëve më të rëndësishëm si Payet dhe Thauvin apo Luis Gustavos ndaj holandezit Kevin Strootman, i afruar nga Roma gjatë merkatos së verës. Lojtarët në fjalë ndihen në plan të dytë. Ish-mesfushori i verdhekuqve do të përfitojë 4.5 milionë euro në sezon, për 5 vitet e ardhshme, pra është më i paguari te Marseille, ndërkohë që peshën kryesore në skuadër e kanë emra të tjerë.
Një situatë e vështirë për t’u zgjidhur nga trajneri, i cili ndoshta duhet ta kishte menduar këtë problematikë para se të këmbëngulte për të afruar me çdo kusht në “Velodrome” futbollistin holandez.
