Piatek pranë Milanit, arrihet akordi me Genoan!
Krzysztof Piatek është shumë pranë transferimit te Milani. Presidenti i Genoas Enrico Preziosi i ka ndezur dritën jeshile transferimit të sulmuesit polak te kuqezinjtë në këtë sesion merkatoje.
Do të jetë pikërisht golashënuesi i dytë më i mirë i këtij kampionati dhe surpriza e vërtetë e sezonit në Serie A, zëvendësuesi i Gonzalo Higuain te Milani.
Përveç se për afrimin e Piatek për të cilin po punon personalisht Leonardo drejtuesit e tjerë të klubit kuqezi Maldini dhe Gazidis do të flasin në Arabinë Saudite me drejtuesit e Juves për të bërë të mundur edhe transferimin e Higuain te Chelsea.
23-vjeçari Piatek autori i 13 golave në kampionat dhe i 19 golave në total me Genoan në këtë sezon do të transferohet te Milani në formë huazimi me detyrim blerjeje nga ana e klubit kuqezi verën e ardhshme për një shifër të përafërt me 40 milionë euro.
