Ora 19:00, Kosovë-Danimarkë, për “Dardanët” testi ideal para Bullgarisë
Danimarka si test i përgjithshëm para eliminatores së parë me Bullgarinë, që do të zhvillohet ditën e hënë. Sot, në orën 19:00, në “Fadil Vokrri” “Dardanët” do të provojnë forcat me një kundërshtar të nivelit të lartë, sfidë që shërben si barometër për përballjet e ardhshme në Grup A kualifikues.
Trajneri Bernard Challandes dhe stafi i tij kishin në dispozicion të gjithë futbollistët e grumbulluar në seancën e fundit stërvitore, megjithatë, dy prej tyre, konkretisht Hekuran Kryeziu dhe Benjamin Kololli, u stërvitën të diferencuar. Challandes e konfirmoi se Kryeziu nuk do të jetë pjesë e ekipit për ndeshjen ndaj Danimarkës, por po punohet shumë që të bëhet gati për takimin kualifikues ndaj Bullgarisë.
Sa i përket Kolollit, ai vazhdon të ketë kujdes me ngarkesën fizike dhe sipas të gjitha gjasave, do ta nisë takimin nga bankina. Sa i përket formacionit të mundshëm, Challandes nuk ka lënë shumë të kuptohet në bazë të vendosjes se lojtarëve në stërvitje.
Megjithatë, Kosova pritet të startojë me skemën e zakonshme 4-2-3-1, ku në portë do të vendoset Arjanet Muriç. Në mbrojtje pritet të startojnë Amir Rrahmani dhe Aliti në qendër, ndërsa Vojvoda në të djathtë e Paqarada në të majtë.
Në qendër të mesfushës pritet të vendosen Herolind Shala dhe Idriz Voca, ndërsa pak më i avancuar Bersant Celina. Në sulm treshja në top formë, Rashica dhe Zeneli nga krahët me Vedat Muriqin në qendër.
Duke pasur në dispozicion edhe 6 zëvendësime, Challandes ka paralajmëruar edhe ndryshime në pjesën e dytë, ku pritet të debutojë edhe mesfushori Florent Hasani.
