Tirana, koha për fitore në shtëpi!
“Shtëpi e hidhura shtëpi” kështu ka rezultuar për Tiranën stadiumi “Selman Stërmasi” në vitin 2019. Bardheblutë nuk e provojnë kënaqësinë që të dhuron një sukses brenda mureve të shtëpisë në një ndeshje kampionati që nga data 27 janar kur gjunjëzonin Kamzën 4-1, pra 3 muaj e 5 ditë që kryeqytetasit nuk janë larguar me 3 pikë nga stadiumi i tyre.
Tirana ka “stonuar” në Tiranë dhe nëse analizon statistikat, 24 herë kampionët janë skuadra me më pak pikë të grumbulluara në ndeshjet në shtëpi, 19 pikë, 5 më pak se Kastrioti. Skuadra me numrin më të ulët të fitoreve në tërësi vetëm 9, dhe rrejdhimisht edhe me më pak fitore brenda, 4. Situata ka qënë thuajse krejtësisht e kundërt në transfertë, sulmi më i mirë i Superiores për ndeshjet jashtë dhe me 18 pikë do të ishte virtualisht në vendin e 4-t.
Shifrat tregojnë se bardheblutë kanë një “ngërç” të dukshëm psikologjik në “Selman Stërmasi”. Tifozeria e zjarrtë dhe fakti që luan në shtëpi në vend që të jetë një bonus është kthyer në një “boomerang” që në thonjza i ka “thyer hundët”, ndërsa në transfertë është parë një Tiranë më e qetë dhe jo rastësisht ka mposhtur Kukësin, Skënderbeun e Teutën. Tashmë nuk ka më kohë për të dorëzuar pikë brenda , pushtimi i “Selman Stërmasit” nga vetë të zotët e shtëpisë duhet të planifikohet e konkretizohet ndaj Skënderbeut, në të kundërt Tirana rrezikon që statistikat për ndeshjet bërnda t’i përmirësoj në një tjetër kategori.
