Muriqi optimist: Në dy ndeshjet e radhës, luajmë për fitore
Sulmuesi Vedat Muriqi ka qenë njëri prej emrave të përzgjedhur nga Përfaqësuesja e Kosovës, që të dalë përpara mediave ditën e sotme, ndërkohë që “Dardanët” janë të grumbulluar për të përgatitur ndeshjet eliminatore të Euro 2020-ës, ndaj Malit të Zi dhe Bullgarisë, më datat 7 dhe 10 Qershor.
25-vjeçari, i cili sapo ka mbyllur një sezon mjaft të mirë në kampionatin turk, me skuadrën e Rizesporit, ka deklaruar se Kosova do të shkojë për fitore, si në Malin e Zi, ashtu edhe në Bullgari, pavarësisht emrave të kundërshtarëve.
“Nuk mund të luajmë për barazim në këto takime, pasi kemi një grup mjaft të fortë dhe për të synuar kualifikimin, duhet të marrim fitore. Do të bëjmë ndeshjen tonë në Malin e Zi dhe në Bullgari më pas, me synimin për të marrë më të mirën. Kemi një skuadër të re, por që luan mirë futboll dhe mund të synojmë maksimumin në këto takime”, tha Muriqi.
Vedat Muriqi shënoi 17 gola dhe asistoi në 8 të tjerë, gjatë 36 ndeshjeve të kampionatit turk me Rizesporin, ku u rendit golshënuesi i dytë më i mirë dhe ka zgjuar interesin e gjigantëve si Fenerbahce dhe Galatasaray.
