Caster Semenia humb betejën edhe në Gjykatën Federale të Zvicrës
Caster Semenya humb sfidën me drejtësinë dhe nuk do të ketë mundësinë që të mbrojë titullin botëror të garës së 800 m për femra të fituar në Londër 2017.
Gjykata Federale e Zvicrës vendosi që të anulojë vendimin për pezullimin e përkohshëm të normës së IAAF, që e detyronte afrikano-jugoren dhe atletet e tjera interseks që t’iu nënshtrohen kurave hormonale më mënyrë që të fitojnë të drejtën për të garuar në kategoritë e femrave.
Ishte vetë sportistja që konfirmoi anulimin e pezullimit të normës së IAAF, që Gjykata Federale e vendosi më 3 qershor. Norma e Federatës Ndërkombëtare të Atletikës, që fillimisht hyri në fuqi në 8 maj, thekson se atletet interseks për të garuar në distancat 400 deri në 1 milje duhet të reduktojnë nivelin e tyre të testosteronit nëpërmjet kurës hormonale. Ky vendim u kontestua shumë, pasi i klasifikonte atletet si Semenya biologjikisht meshkuj.
Gjithsesi Semenya nuk ka ndërmend të dorëzohet pavarësisht këtij vendimi të dhimbshëm të dhënë nga Gjykata Federale e Zvicrës.
“Jam shumë e zhgënjyer për faktin që nuk do të kem mundësi të mbroj titullin të cilin e fitova me aq shumë mund”, – tha Semenya, – “por kjo nuk do të më dekurajojë në objektivin tim për të vijuar betejën për të drejtat njerëzore për të gjitha atletet e përfshira në të gjithë këtë histori”.
