Nevoja për tregje të reja, edhe Seria A mund të dalë jashtë kufijve italianë
Ashtu si NBA dhe NFL, edhe Seria A do të tentojë të dalë jashtë kufijve italianë, pasi është hedhur ideja që të paktën një ndeshje në sezon, të luhet jashtë Italisë.
Propozimi ka ardhur direkt nga administratori i Ligës së Serisë A, Luigi De Siervo, që e arsyetoi këtë ide si një mënyrë për të synuar tregje të tjera botërore, kryesisht amerikane e aziatike.
“Do të propozojmë që të paktën një ndeshje në sezon ta luajmë jashtë Italisë. Sfida jonë do të jetë që të bëhemi pjesë e tregjeve të tjera, duke afruar fansat me kampionatin dhe vendin tonë. Natyrisht që me legjislacionin aktual është e pamundur, por besoj se gjërat do të ndryshojnë për mirë në javët në vijim”, tha De Siervo.
Vitin e kaluar ishte kampionati spanjoll që tentoi të çojë në Shtetet e Bashkuara të Amerikës ndeshjen mes Gironës dhe Barcelonës, por për arsye të ndryshme nuk u arrit të konkretizohej plani.
