Futbollistë të Kombëtares, klube dhe… Matic, luten për të prekurit nga tërmeti
Lajmi për tërmetin e rëndë, që tronditi Shqipërinë mëngjesin e djeshëm dhe shkaktoi mbi 20 të vdekur (bilanc që mund të rritet) e qindra të plagosur, nuk ka lënë indiferentë as botën e futbollit, që është solidarizuar menjëherë me shtresën e prekur të shoqërisë.
Kështu Federata Shqiptare e Futbollit ndërpreu të gjithë aktivitetet e parashikuara për këtë fundjavë, ndërsa lutjeve për të prekurit nga tërmeti iu bashkuan disa futbollistë të Kombëtares Shqiptare, por edhe emra si Xherdan Shaqiri e Granit Xhaka, shqiptarë të Kosovës, që përfaqësojnë kombëtaren e Zvicrës.
Mesazhe pati edhe nga ish trajnerët kuqezi Gianni De Biasi e Cristian Panucci, por edhe drejtori sportiv i Lazios, Igli Tare, ndërsa nuk ngurroi t’u bashkohej lutjeve edhe mesfushori serb i Manchester United, Nemanja Matiç.
