Ousmane Dembele mbyll sezonin, Rey Manajt i “troket” fati?
Lajmet e këqija për Ousmane Dembélé. Testet mjekësore, të cilave sulmuesi i Barcelonës iu nënshtrua së fundi kanë konfirmuar këputjen e plotë të tendinës së femurit në kofshën e djathtë.
Dembélé ndjeu disa shqetësime në stërvitjen ditën e hënë që e detyruan atë të tërhiqej para kohe nga seanca stërvitore. Shërbimet mjekësore të Barcelonës gjithsesi nuk e kanë përcaktuar kohën që i duhet futbollistit francez për t’u riaftësuar plotësisht.
Ousmane Dembélé e dëmtoi biceps femoral më 27 nëntor në ndeshjen kundër Borussia Dortmundit, në “Camp Nou”. Stafi i Barcelonës parashikoi fillimisht një mengesë 10-javore.
Këputja e plotë e tendinës së bicepsit është i njëjti lëndim që pësoi Dembélé në vitin 2017 në fushën Getafes, vetëm se në atë rast dëmtimi ndodhi në kofshën e majtë. Në atë kohë ai qëndroi katër muaj pushim.
Me dëmtimin e ri të Dembélésë, Barça ka në dispozicion vetëm tre sulmues në ekipin e parë: Messin, Griezmannin si dhe një Ansu Fatin.
Mungesa e Dembelesë, që praktikisht e ka mbyllur sezon, shton shanset e grumbullimit në ekipin e parë të Rey Manajt, që jo më kot është përfshirë në listën e futbollistëve për Championsin.
22-vjeçari kuqezi mund të gumbullohet në vazhdimësi nga Quique Setien për vetë faktin se është një qendërsulmues tipik e mund të zëvendësojë sadopak Luis Suarezin, që si Dembele do të mungojë për katër muaj, pra deri në fund të sezonit.
