Djarmati, i propozuar nga Rijeka: Do të jetoj në Shkodër, më ka ndryshuar jeta 360 gradë
Sponsori i Vllaznisë, Alban Xhaferi, gjatë prezantimit të drejtorit të ri sportiv, Matko Matko Djarmati, zbuloi se ky emërim ka lidhje me binjakëzimin e klubit shkodran me Rijekën në Kroaci.
“Ky bashkëpunim erdhi si binjakëzim me Rijekën në Kroaci. Ky ishte një propozim i tyre dhe, duke dëgjuar planin e tij, vendosëm për të. Uroj dhe shpresoj që të jetë fillim i mbarë, sepse nga sezoni i ardhshëm kemi plane konkrete për në Europë”.
Djarmati duket se e ka marrë shumë seriozisht detyrën e re. Kjo kuptohet nga fjalët e tij në prezantim.
“Të paktën, një herë në javë do të jemi bashkë në komunikim. Me gazetarët do të jemi korrektë, sepse pa ju klubi i Vllaznisë nuk është i madh. E di ku kam ardhur dhe këto tri ditë që jam në Shkodër më ka ndryshuar jeta 360 gradë. E ndiej peshën e fanellës dhe jam gati për këtë detyrë. Kam ardhur nga propozimi i Rijekës këtu, për një qëllim sportiv.
Do të provoj të finalizoj objektivat. Po presim përgjigje nga bordi i Rijekës, por brenda kontratës duhet të ndryshojnë gjërat dhe të kemi propozime konkrete. Klubi më ka gjetur apartament dhe kam katër ditë që jetoj në Shkodër”.
