Partizani në ngërç rezultatesh, vetëm një fitore në shtatë ndeshjet e fundit
Vetëm një fitore në shtatë ndeshjet e fundit, duke përfshirë edhe Kupën, duket sikur është bilanci i Apolonisë që mbyll renditjen e Superiores dhe jo i një ekipi pretendent për titull si Partizani.
“Demat” kanë fituar vetëm derbin e 13 Marsit që nga 21 shkurti e deri më sot, shumë pak për një ekip që me përforcimet e Janarit supozohej se do të fuqizohej më tepër, diçka që nuk ka ndodhur.
Paraqitje e “të kuqve” në transfertën e “Loro Boriçit” nuk ishte zhgënjyese, sepse me një trajner si Ilir Daja vështirë që të mos kesh një koncept loje, por tentativat në portë ishin të pakta, një ekip që shkon deri tek burimi, por as nuk zgjatet për dy pika ujë.
Ky është një “handikap” jo për t’u anashkaluar, sepse kur një skuadër ka problem finalizimi e ka shumë të vështirë të marrë maksimumin në një ndeshje, këtë e vërtetojnë edhe 3 rezultatet e fundit ku demat nuk kanë shënuar asnjëherë.
Gjithsesi ka qenë një periudhë që përpos anës negative, ka patur edhe vlerat e veta. Faza mbrojtëse ka funksionuar, sepse duke përfshirë dhe Kupën, Partizani ka 3 ndeshje radhazi që nuk pëson, është mbrojtja e dytë e kampionatit pas Teutës dhe pak herë shfaq pakujdesi në fazën defensive.
Thuhet që sulmi fiton ndeshjet, por mbrojtja fiton titujt. A do të ndodhë kështu me të kuqtë, kjo mbetet për t’u parë në fund të 10 takimeve të ardhshme.
