Rrëfehet Pejiç, nga trajneri te merkatoja e sulmuesve dhe oferta nga Partizani
Ish bomberi i Superiores, tashmë në rolin e drejtorit teknik te Kukës, Pero Pejic ishte në një lidhje direkte me emisionin “Gol pas Goli” në Supersport, ku foli për çështjen e trajnerit Diego Longo, por edhe për vështirësitë e gjetjes së sulmuesve.
Çështja e trajnerit – Ishte një humbje normale, ndonëse bëmë një ndeshje të mirë. Nuk ka asnjë çështje trajneri, pasi fola me të pas ndeshjes dhe iku 2-3 ditë në Itali të qetësohej e më pas erdhi të vijojë punën. Na pret një ndeshje e vështirë, por ne luajmë gjithmonë për të fituar, pavarësisht sa do t’ia dalim. Dihet forca e Partizanit dhe çdo rezultat është i pranueshëm.
Gjetja e sulmuesve – Është e vështirë, pasi sulmuesit e mirë kushtojnë shumë dhe në Shqipëri nuk e kemi luksin të paguajmë shuma të mëdha. Po mundohemi të bëjmë më të mirën, por është e vështirë që të gjesh një sulmues race.
Partizani nuk ka asnjë fitore – Partizani është Partizani dhe dihen vlerat e atij ekipi. Vitin e kaluar na kanë mposhtur në të katër ndeshjet dhe kanë treguar se janë ekip i fortë. Këtë sezon ka marrë vetëm tre pikë, por unë nuk e kam ndjekur shumë, pasi jemi të përqendruar te ekipi ynë dhe duam të bëjmë sa më mirë .
A është Europa një objektiv i kënaqshëm? – Kukësi luan gjithmonë për trofe, qoftë Kupë apo kampionat, por nëse nuk ia dalim të fitojmë, të paktën të arrijmë një vend në Europë. Unë mendoj se jemi mirë dhe do të luajmë për titullin kampion.
A do të pranonit një ofertë nga Partizani?Unë jam në kontakt të vazhdueshëm me Safetin, pasi kam shumë respekt për të. Këtë verë kemi folur që të vazhdoj të ndihmoj ekipin, gjë që e bëj me shumë kënaqësi. Për momentin nuk kam ofertë nga partizani, ndaj nuk e di çfarë të them.
