Longo para Skënderbeut: Të tregojmë se nuk jemi ata të Kupës, e dimë si fitoi Dinamo në Korçë
Trajneri i Kukësit, Diego Longo ka dalë në konferencë për shtyp teksa ka folur për ndeshjen e nesërme ndaj Skënderbeut në transfertë. Tekniku i verilindorëve theksoi dëshirën e skuadrës për të treguar se nuk janë në të vërtetë ata që humbën ndaj Egnatias në Kupë, ndërsa shtoi se korçarët janë një rival delikat duke kujtuar edhe faktin se Dinamo i mposhti vetëm me një gabim të arbitrit.
“Ne duam të tregojmë veten se nuk jemi ata të Kupës, jemi shumë të motivuar për këtë ndeshje. Çfarë ndodhi në Kupë? Nuk luajtëm si e përgatitëm ndeshjen, ndonjëherë ndodh. Më mirë që ndodhi tani, kemi 80% mundësi për të kaluar në çerekfinale”.
Skënderbeu, vendi i fundit në klasifikim? “Janë shumë të organizuar në mbrojtje, Vllaznia nuk fitoi atje, e dimë si fitoi Dinamo, me një gabim të arbitrit. Ata luftojnë, i njohim dhe e dimë që janë ekip i rrezikshëm. Një barazim për ta do ishte fantastik, ne duam të fitojmë çdo ndeshje. Po e bëjmë për veten dhe për të gjithë njerëzit në Kukës”.
Në fundjavë tifoz me Dinamon? “Nuk më intereson, jam vetëm tifoz i Kukësit”.
Është problem kalendari duke marrë parasysh aspektin fizik? “Është për të gjithë skuadrat, nuk e kuptoj pse ka dy ture Kupa. Të gjitha kolegët e mi nuk janë të lumtur. Edhe fushat janë problem, ndaj Egnatias fusha ishte skandaloze prandaj deri në një pikë të caktuar do ishte mirë që ndeshjet e Kupës të ishin me një takim”.
