Tedi Cara: Fitore morali, mundim edhe Kukësin, edhe Tiranën
Tedi Cara nuk shënoi në derbin me Dinamon, madje humbi një rast të pastër me kokë, megjithatë kishte meritën kryesore që i dha mundësinë Esat Malës të shënonte golin që vendosi sfidën. Në “Gol pas Goli”, sulmuesi kavajas e pranoi se goditjet me kokë janë pika e tij më e dobët:
“Është problemi im, goditjet me kokë. Do të mundohem në stërvitje të përmirësohem. E shoh pikë të dobët timen. Rasti ishte shumë i pastër, duhej të shënoja. Kur nuk ka pasur pritshmëri, kam shënuar. Futbolli i ka këto. Pritshmëritë janë të larta, shpresoj ta kem shpërblyer besimin me golat e mi. Të gjithë ishin shumë të lumtur për fitoren, askush nuk më tha pse humba rastin.”
Fitore morali: “Me këtë ndeshje që zhvilluam ndaj Dinamos, fituam moral për vazhdimësinë. Kjo fitore na jep shumë besim. E thashë edhe më parë që e kemi dominuar Dinamon. Pas sfidave me Kukësin dhe Tiranën, do të flasim për titullin. Kam shumë besim se do të marrim maksimumin edhe në këto dy ndeshje.”
