Pogba ndahet nga Manchester United në verë, gëzohet Barcelona
Barcelona është e interesuar për mesfushorin e Manchester United Paul Pogba, një lëvizje e të cilit drejt katalanasve ishte planifikuar që tetorin e kaluar, por marrëveshja nuk u arrit pasi spanjollët nuk ishin në gjendje të përmbushnin kërkesat e tij për pagën e lartë.
Ndërkaq, javën e kaluar klubi i Barçës arriti një marrëveshje të madhe me Spotify, me vlerë rreth 283 milionë euro, gjë e cila rimëkëmbi ekonominë e gjigantëve spanjoll, të cilët ishin në prag falimentimi vitin e kaluar.
Tashmë që problemet ekonomike për klubin katalanas kanë mbetur pas, duket se ata kanë rikthyer fokusin tek mesfushori i Manchester United, Paul Pogba.
29-vjeçari është duke planifikuar një lëvizje të mundshme në verë, pasi kontrata e tij me Manchester United përfundon në fund të sezonit. Francezi është shprehur se dëshiron ta përfundojë karrierën e tij në Spanjë, gjë e cila lë të hapur mundësinë e një afrimi të mundshëm të mesfushorit te Barcelona sezonin e ardhshëm edhe pse ofertat për Pogban nuk kanë munguar.
Klube të tjera si Real Madridi apo Paris Saint-Germain, kanë shfaqur interes për mesfushorin, Juventusi në krahun tjetër kërkon një rikthim të lojtarit në klub.
Merkato e janarit ndihmoi që Barcelona të rikthehej në formë pas një performance jo të mirë në fillim të sezonit. Pierre-Emerick Aubameyang ka shënuar 5 gola në gjashtë ndeshje, ndërsa Dani Alves, Ferran Torres dhe Adama Traore kanë pasur gjithashtu performanca shumë të mira.
