Pas suksesit me Pedrin, Barça firmos me një tjetër adoleshent
Barcelona është e fokusuar te talentet dhe ndërtimi i një skuadre për të ardhmen. Pas suksesit me Pedrin, klubi katalanas ka firmosur me 19-vjeçarin e Real Racing, Pablo Torre.
Më katër mars u raportua se klubi katalanas ka blerë mesfushorin Pablo Torre për 5 milionë euro, e njëjta shifër që është marrë edhe Pedri.
20 milionë të tjera do të paguhen nga Barça nëse lojtari përmbush objektivat gjatë kohës së tij në Katalunjë, por edhe shifra e parës është tunduese për një futbollist që ka luajtur vetëm në kategorinë e tretë.
Megjithatë Torre ka treguar se është shumë i mirë për atë nivel, pasi ka kontribuuar në 15 gola dhe asistime në kampionatin 2021-2022, deri më tani.
Lajmin e firmosjes me talentin e ka bërë publik vetë faqja zyrtare e Barçës, ku ndër të tjera theksohet fakti që kontrata mes palëve do të zgjasë deri në 2026-ën.
