Revolucion tek Egnatia, sulmuesi deklaron divorcin nga rrjetet sociale
Egnatia do të pësojë shumë ndryshime dhe i radhës që largohet është sulmuesi Artur Magani. Peqinasi e ka njoftuar diçka të tillë përmes një postimi në rrjetet sociale.
Magani shkruan: “Përshëndetje! Ishte kënaqësi të isha pjesë e Egnatias. Në këto dy vite kemi kaluar shumë momente të mira me të gjithë shokët e skuadrës.
Falënderoj të gjithë tifozët e mrekullueshëm ULTRAS EGNATIA për mbështetjen e vazhdueshme. Nga sot jam lojtar i lirë”.
Magani ishte bashkuar me Egnatian që verën e vitit 2020 në Kategorinë e Parë dhe sezonin e shkuar ai luajti 28 ndeshje, duke shënuar 3 gola në Abissnet Superiore.
Në të shkuarën në elitë sulmuesi ka luajtur me Shkumbinin dhe Teutën, ndërkohë që ka veshur edhe fanellën e Gramshit e Kamzës në Kategorinë e Parë, veç eksperiencave në Kosovë me Lirinë dhe Feronikelin.
Sakaq, zyrtarizimin mbi ndërprerjen e bashkëpunimit me Maganin e ka bërë edhe vetë klubi rrogozhinas që është përshëndetur gjithashtu edhe me portierin Klevis Hasanbelli.
