”Fjalët e Xavit më emocionuan, te Barcelona prej tij”, prezantohet mbrojtësi francez
Jules Kounde është përforcimi i radhës i Barcelonës, që fitoi rivalitetin me Chelsea për shërbimet e qendërmbrojtësit të Sevillas. 23-vjeçari debutoi vitin e kaluar me kombëtaren e Francës, teksa mund të luajë edhe si mbrojtës i djathtë.
Drejtuesit e Barcelonës bindën homologët andaluzianë me një ofertë 50 milionë euro + 10 të tjera në formë bonuesh. Kounde firmosi një kontratë 5-vjeçare dhe zbuloi se ishte Xavi ai që e bindi të vijonte karrierën në “Camp Nou”.
“Jam i emocionuar që ndodhem këtu dhe mund të luftoj në të gjitha kompeticionet për t’i fituar. Unë dua të fitoj trofe. Xavi ishte i rëndësishëm në vendimin tim për të zgjedhur Barcelonën.
Kam biseduar disa herë me të, fjalimi i tij më emocionoi. Ne e shikojmë futbollin në të njëjtën mënyrë. Shpresoj të jem protagonist në këtë klub“, deklaroi lojtari me origjinë nga Benini.
Kounde është përforcimi i pestë i Barcelonës, që ka siguruar edhe shërbimet e Robert Lewandowskit, Franck Kessie, Andreas Christensen dhe brazilianit Raphinha.
TESTONI NJOHURITË TUAJA RRETH PREMIER LEAGUE
QUIZ/ Premier League 2021-2022 – Sa mirë e kujtoni sezonin që sapo u mbyll?
