Zyrtare/ Fulham “blindon” talentin dardan, Pajaziti: Fantastike, do ul kokën të punoj më shumë
Adrion Pajaziti luan si mesfushor, ai ka lindur në Londër dhe është rritur në akademinë e Fulhamit, klub që këtë sezon u rikthye në Premier League.
19-vjeçari, i cili numëron 3 ndeshje me Kosovën U21, ishte një ndër lojtarët më të dalluar tek ekipi U21 sezonin e fundit, duke regjistruar dy gola dhe pesë asiste.
Pajaziti ka firmosur sot një kontratë 3+1 me ekipin e parë të Fulhamit, që e nisi kampionatin me dy barazime kundër Liverpoolit dhe Wolves.
“Klubi ka kënaqësinë të njoftojë se Adrion Pajaziti ka nënshkruar një kontratë të re trevjeçare, me një opsionin e zgjatjes së bashkëpunimit me një tjetër vit.
Paraqitjet pozitive në sezonin e kaluar ndikuan që Adrioni të debutonte me ekipin e parë në ndeshjen e Carabao Cup kundër Birmingham City”, lexohet në komunikatën zyrtare të klubit londinez.
“Jam shumë i lumtur. Hap i bukur për mua, e ardhmja ime është siguruar, por tani duhet të ul kokën dhe të punoj fort.
Jam pjesë e Fulhamit që kur isha 11 vjeç, është fantastike të vijoj rrugëtimin tim këtu. Zhvillova një fazë përgatitore të mirë me ekipin e parë.
Këtë sezon do të luaj në Premier League 2 me ekipin U21. Dua të bëhem një lojtar sa më i mirë, që të jem gati të shfrytëzoj momentin kur të më thërrasë ekipi i parë”, deklaroi talenti dardan pas firmës mbi kontratën e re.
TESTONI NJOHURITË TUAJA RRETH PREMIER LEAGUE
QUIZ/ Premier League 2021-2022 – Sa mirë e kujtoni sezonin që sapo u mbyll?
