“Camp Nou” shndërrohet në “vullkan”, “avullojnë” biletat për ndeshjen me Interin
Barcelona thërret dhe tifozeria përgjigjet. Në faqen zyrtare të klubit katalanas nuk ka më bileta për shitje për ndeshjen ndaj Interit, me “Camp Nou”-n që do të jetë një vullkan “blaugrana” mbrëmjen e të mërkurës.
“Të mërkurën ju do të jeni lojtari i 12”, thuhej në thirrjen e klubit menjëherë pas humbjes 1-0 në “San Siro” dhe kaq mjaftoi që në më pak se 48 orë të avullojnë të gjithë biletat për supersfidën e javës së ardhshme.
Thirrja e klubit është e ngjashme me atë të 2010-ës, kur Interi fitoi gjysmëfinalen e parë ndaj Barcelonës me rezultatin 3-1 dhe katalanët bënë apel për “remuntada” në sfidën e kthimit, por atëherë misioni dështoi.
Interi shkon në Barcelonë për dy rezultate, pasi nëse ia del të marrë një barazim, atëherë siguron kualifikimin me një fitore në dy ndeshjet e ardhshme ndaj Slavias së Pragës dhe Bayernit, ndërsa me një fitore, merr direkt biletën që në “Camp Nou”.
Nga ana tjetër, Barcelona është e dënuar të fitojë dhe mundësisht me më shumë se një gol diferencë, për të çuar në favorin e saj bilancin në përballjet direkte mes dy skuadrave.
