“Aventura” e Lushnjes, 10 orë në traget për tu mundur nga Leçe
Ëndërr e një nate vere. Kështu mund të përkufizohet miqësorja e Lushnjes, e luajtur ndaj Leçes, skuadër që militon në katëgorinë e tretë italiane.
Ekipi i drejtuar nga Artan Bano udhëtoi gjithë natën me traget, në total 10 orë për të kaluar detin Adriatik, zbarkoi në Itali paraditen e së enjtes, ndërsa në mbrëmje luajti miqësoren.
Në fund, Lushnja u mposht 4-0, pasi pjesa e parë e përballjes u mbyll me rrjeta të paprekura. Turchetta me dy gola, Pacilli dhe Monaco vulosën fitoren e Leçes.
Por, ajo që të befason në këtë histori është përse një skuadër, që fazën përgatitore po e zhvillon në qytetin e saj në Shqipëri, të ndërmarrë një udhëtim të tillë raskapitës për të luajtur përballë 500 tifozëve.
Kundërshtari i miqësores nuk ishte një emër luksi, ndërsa në 5 vitet e fundit militon në ligat e ulëta, pas dënimit nga Komisioni i Disiplinës në Federatën Italiane, prej përfshirjes në skandalet e basteve.
