U19 femra, Spanja shumë e fortë për Shqipërinë
Spanja kampione e Europës për 19-vjeçare në futboll për femra ishte thjesht shumë e fort për Shqipërinë. Kombëtarja jonë humbi me rezultatin e thellë 8-0 përballë iberikeve, në një ndeshje pa histori, në startin e kualifikueseve të kësaj grupmoshe, të vlefshme për Europianin “Zvicër 2018”.
Spanja e nisi serinë e golave me Bautistan pas vetëm 9 minutave lojë. Dueñas dyfishoi rezultatin në të 17-ën, ndërsa Fernandez në të 20-ën realizoi edhe golin e tretë.
Pa asnjë shans për të marrë rezultat dhe me ndeshjen që praktikisht u mbyll, kolapsi përpara pushimit ndërmjet pjesëve ishte fatal për 19-vjeçaret shqiptare, me Spanjën që realizoi edhe tre gola të tjerë në harkun e katër minutave me Dueñas, (min 40) Bautista (min 41) dhe Fernandez. (min 40)
Të treja këto futolliste realizuan nga dy gola secila në pjesën e parë të ndeshjes, e cila u mbyll në avantazh 6-0, por “Furia e Kuqe” nuk kishte ndërmend të ndalej dhe këtë e tregonte sa herë që shënonte, me lojtaret që nxitonin ta vendosinin topin në mesin e fushës.
Në pjesën e mbetur të ndeshjes, Spanja shënoi edhe dy gola të tjerë me autore Egurrolan në minutat 68 dhe 73, duke u konfirmuar si skuadra favorite për të fituar Grupin 4 kualifikues.
Megjithë humbjen e thellë, për përfaqësuesen e trajnerit Dede asgjë nuk ka mbaruar. Vajzat kuqezi kanë ende shanse të provojnë kualifikimin si ekipi i vendit të dytë, të favorizuara nga fitorja e Azerbajxhanit “outsider” përballë Ukrainës, që cilësohej forca e dytë e grupit.
Kualifikueset femra U-19 Grupi 4
Azerbajxhan 2 – 0 Ukrainë
Spanjë 8 – 0 Shqipëri
Renditja
- Spanjë 3
- Azerbajxhan 3
- Ukrainë 0
- Shqipëri 0
/////////////////
28 Tetor
Spanjë 12:00 Azerbajxhan
Ukrainë 14:00 Shqipëri
31 Tetor
Shqipëri 14:00 Azerbajxhan
Ukrainë 14:00 Spanjë
