Albano Aleksi nuk fshihet: Titulli një ëndërr që mund të bëhet realitet me Teutën
Mini-faza përgatitore ka qënë deri më tani e mbarë për Teutën, ngarkesa fizike është asimiluar në mënyrën e duhur dhe më kryesorja janë shmangur dëmtimet. Albano Aleksi që ishte një ndër afrimet kryesore të merkatos së verës dhe ka zbritur në fushë si titullar në 15 ndeshje e vlerëson maksimalisht punën e bërë nga skuadra deri më tani.
Në dy sfidat përmbyllëse të 2019-ës trajneri i ri Edi Martini ja doli të konkretizonte dy fitore, mesfushori 27-vjeçar nuk i kursen fjalët pozitive edhe për teknikun shkodran.
Mos largimi i Kallakut ishte ndoshta goditja më e rëndësishme për klubin, ndërkohë që është afruar edhe një sulmues me fizik imponues si Ide Kulibali, 2.04 m. Aleksi analizon shkurtimisht edhe merkaton duke mos e fshehur kënaqësinë për qëndrimin e një talenti si Sherif Kallaku.
Përsa i përket objektivave, 27-vjeçari ashtu si shumë futbollistë në Shqipëri ka gati shprehjen rutinë “ti marrim ndeshjet një e nga një”, megjithëse në fund nuk e fsheh dëshirën për kurorën e kampionit.
