Arsenali pret Tottenhamin në derbi, Southampton kërkon fitoren e parë
Premier League dhuron emocione të pafundme çdo fundjavë, të cilat natyrisht që mund t’i përjetoni të plota vetëm në ekranin e SuperSport, teksa 24 orë pas super-përballjes Chelsea-Manchester City, radhën e ka derbi i Londrës, Arsenal-Tottenham.
Ndonëse pa lavdinë e dikurshme, të dy këto ekipe kanë cilësinë dhe elementët e duhur, që të ndërthurura me rivalitetin e fortë, të prodhojnë një 90-minutësh spektakolar në “Emirates Stadium”.
Vendasit e nisën sezonin në mënyrë katastrofike, duke rreshtuar tre humbje në tre ndeshjet e para, por kanë reaguar mirë dhe kanë fituar me rezultat minimal 1-0 dy sfidat e fundit në kampionat, duke u ngjitur në kuotën e 6 pikëve.
Nga ana tjetër, Tottenhami e nisi me tre fitore radhazi, të gjitha me rezultat minimal 1-0, ndërsa më pas ka rreshtuar dy humbje të rënda, 3-0 ndaj Crystal Palace dhe Chelsea-t, duke bërë që të mbeten në kuotën e 9 pikëve, larg zonës së kreut.
Ajo që vihet re në të dy skuadrat londineze, është vështirësia për të shkuar te goli, pasi”topçinjtë” kanë shënuar vetëm dy gola në 450 minuta, ndërsa “Spurs”-at kanë dërguar tre herë topin në rrjetë në të njëjtën kohë.
E nëse në finalizim ka shumë vend për përmirësim, e njëjta gjë vlen edhe për mbrojtjet përkatëse, pasi veçanërisht ajo e Arsenalit është shfaqur shpesh e pa orientuar dhe ka pësuar një numër të konsiderueshëm golash.
Gjithsesi në orën 17:30, në “Emirates” pritet një sfidë e luftuar nga të dy palët dhe natyrisht që duke parë formën e dy skuadrave, ajo që do të gabojë më pak, do të mund të festojë edhe marrjen e tre pikëve në fund.
Më herët, në orën 15:00 në ekranin e SuperSport do të transmetohet edhe përballja tjetër e kampionatit anglez, ajo mes Southamptonit dhe Wolvesit, dy skuadra që vendin e tyre e kanë në mesin e renditjes, ndonëse starti i sezonit nuk ka qenë aspak i mirë.
Southampton e nisi me një humbje, ndërsa më pas ka rreshtuar 4 barazime radhazi, njërin prej të cilëve në transfertën ndaj Manchester City-t një javë më parë, ndërsa për skuadrën e Hasenhuttl mund të luajë nga minuta e parë edhe sulmuesi i kombëtares shqiptare, Armando Broja, i cili nuk e ka gjetur ende golin e tij të parë në Premier League.
