“Barcelona jeton në të kaluarën!”- Koeman tjetër “goditje” katalanasve
Ish-trajneri i Barcelonës, Ronald Koeman, i cili u shkarkua më 27 tetor 2021 dhe u zëvendësua nga legjenda e klubit Xavi është rikthyer të flasë për katalanasit dhe të “trazojë” ujërat.
Koeman tha se Barça jeton në të kaluarën dhe kjo ka të bëjë me sistemin që skuadra po përdor.
“Unë jam për dominimin e lojës. Me këtë sistem për tre apo katër muaj kemi luajtur lojërat më të mira të viteve të fundit. Shembulli më i qartë ishte finalja kundër Athletic. Barça jeton në të kaluarën, kujton ende sistemin ‘tiki-taka’, por futbolli ka ndryshuar. Tani është më i shpejtë, më fizik. Nuk mund të jetosh në të kaluarën.”-tha ai.
Sa i përket merkatos, Koeman foli edhe për “telenovelën” Lewandowski.
Koeman është një tifoz i yllit polak, por deklaroi se ka dyshime mbi këtë lëvizje, për shkak të gjëndjes financiare që po kalon klubin.
“Lewandowski është 33 vjeç dhe unë kam dyshimet e mia. Ndoshta i kanë mbetur edhe dy vite për të dhuruar nga cilësitë e tij. Kam shumë dyshime për transferimin e tij sepse për një lojtar të tillë nuk mjafton të kesh në gjendje vetëm shumën për kartonin e tij (50 apo 60 milionë), por edhe të plotësosh kërkesat e tij për pagën”-shtoi tekniku.
Koeman drejtoi Barcelonën në 67 ndeshje, por ende nuk e ka harruar mënyrën se si u shkarkua. Tekniku holandez është në pritje, pasi do të marrë drejtimin e ekipit të kombëtares së Holandës, pasi Louis van Gaal do të largohet në përfundim të Kupës së Botës, Katar 2022.
