Bayerni i vendos çmim Lewandowskit, pa këtë shumë qëndron te kampionët e Bundesligës
Bayerni i Mynihut i ka vendosur çmim Robert Lewandowskit, pasi sulmuesi polak dhe klubi bavarez janë larg në qëndrime sa i përket rinovimit të kontratës. Duke qenë se pas pak më shumë se një viti 33-vjeçari do të jetë i lirë për të zgjedhur klubin ku dëshiron të luajë, kampionët e Bundesligës nuk duan ta humbin me parametër zero.
Sipas “Sport”, polaku do të largohej nga skuadra gjermane këtë verë për 40 milionë euro. Në Mynih mendojnë se është ende e mundur që sulmuesi të zgjatë bashkëpunimin, por gjithashtu janë të vetëdijshëm se Lewa mund të largohet në çdo kohë ndaj i kanë vënë çmim kartonit të tij.
Barcelona, nëse dëshiron ta marrë Lewandowskin këtë verë, mjafton të paguajë 40 milionë euro. Bayerni nuk pranon përfshirjen e lojtarëve të tjerë në bisedime, por vetëm para “cash”. Në të kundërt, do ta mbajë edhe një vit, deri në përfundim të kontratës.
