Dalipi apel tifozërisë së kuqe: Futbolli luhet për ju
Klevis Dalipi debutoi me fitore në stolin e Partizanit dhe njëkohësisht i shkaktoi humbjen e parë Luftëtarit, pas 11 takimesh.
Pas golit të Bathës, keni shpërthyer në festë. Ishte kjo një mënyrë për të shfryrë presionin e krijuar?
Dalipi: Fillimi ishte vërtetë i vështirë për ne, veçanërisht 10 minutat e para, por ai gol i Trashit, ishte prej një sulmuesi race, dhe na çliroi në veprimet tona. Më pas, skuadra doli në lojën e vet dhe si rrjedhojë shënuam edhe dy golat e tjerë, por mund të bënim akoma më mirë.
Kjo fitore ju mban në lojë për një vend në Europë. Sa mundësi ka Partizani t’ia dalë të realizojë objektivin?
Dalipi: Vështirësia shtohet, pasi në çdo takim ka skuadra që pretendojnë për diçka dhe kjo është faza më e ‘nxehtë’ e kampionatit. Duhet të punojmë shumë për të arritur objektiva madhorë, dhe për të përballuar me sukses pjesën e mbetur.
A ishte një strategji, bllokimi i 3-shes së Luftëtarit, Abazar-Bregu-Rroca?
Dalipi: Natyrisht që një skuadër e madhe bëhet edhe nga interpretimi i mirë i fazës mbrojtëse, jo vetëm në sulm. Ne izoluam kundërshtarët, duke evituar rrezikun që vinte nga lojtarët kryesorë të saj.
Jasir Asani u duk se pati një rënie të formës, krahasuar me ndeshjet e fundit.
Dalipi: Nuk mendoj se pati rënie, por lojtari u konsumua shumë, duke ndihmuar edhe mbrapa. Zëvendësimi i tij ishte taktik, pasi isha i kënaqur me atë që po jepte deri në ato momente.
A keni një apel për tifozërinë e kuqe?
Dalipi: Patjetër. Futbolli luhet për tifozët dhe duhet të vijnë sa më të shumtë në numër. Ne do mundohemi të japim më të mirën dhe t’i kënaqim me rezultate dhe lojë.
