De Jong drejt Man. United? Barcelona pret të dëgjojë ofertën
Klubi i Barcelonës nuk ka marrë oferta të rëndësishme zyrtare për lojtarët “blaugrana”. Të paktën deri më sot, jo. As për Frenkie de Jong, i cili konsiderohet elementi që mund të sigurojë më shumë para për arkat e klubit.
Frenkie de Jong është përfolur për një transferim te Manchester United që kur Ten Hag u ul në stolin e “Djajve të Kuq”. Në Manchester është folur edhe me shifra, por nuk ka pasur asnjë kontakt deri më tani apo ndonjë propozim. Disa deklarata të vetë lojtarit me skuadrën e Holandës duket se e ushqejnë këtë teori, megjithëse De Jong ka insistuar gjithmonë se dëshira e tij është ta vijojë karrierën në “Camp Nou”.
Drejtuesit e Barcelonës janë të hapur për bisedime. Ata e konsiderojnë të një profili që i përshtatet Barçës, edhe për faktin që Xavi e vlerëson shumë, por nëse klubi anglez bën një propozim të kënaqshëm për të dyja palët, do të merrej në konsideratë.
