Dhuna ndaj portierit Frashëri, reagojnë Gjilani dhe “Skifterët”
Festa për një gol të shënuar në minutën e 95-të të sfidës Gjilani-Ballkani, është shndërruar në një akt të shëmtuar dhune të tifozëve vendas ndaj portierit mik, korçarit Stivi Frashëri, që ka marrë një goditje me grusht e një tjetër me shqelm, të dyja pas koke dhe ka përfunduar në spital.
Ndeshja u ndërpre menjëherë për t’i ardhur në ndihmë Frashërit dhe nuk rifilloi më, ndërsa klubi i Gjilanit reagoi menjëherë, duke shprehur solidarizim me portierin dhe dënuar me forcë aktin e dhunshëm të tifozëve.
Në të njëjtën linjë ka qenë edhe kryesia e tifo-grupit “Skifterët”, pjesë e të cilëve ishin edhe tifozët që dhunuan Frashërin. Këta të fundit kanë shkuar në spitalin e qytetit për t’i kërkuar ndjesë Frashërit dhe kanë dhënë menjëherë dorëheqjen nga kryesia, duke pranuar se dështuan të mbajnë nën kontroll tifozët.
