Duro: Dënimi mund të na penalizojë por shikojmë përpara
Shpëtim Duro kundër të shkuarës. Trajneri i Flamurtarit viziton të dielën stadiumin “Selman Stërmasi” me skuadrën kuqezi që kërkon të ruajë vendin e tretë në klasifikimin e përgjithshëm për të mos e humbur hapin europian. Fitorja ndaj Kamzës e ka rritur moralin e ekipit vlonjat por kjo fundjavë do të heqë shumë pikëpyetje rreth forcës së vërtetë të kësaj skuadre. Ai eviton të përgjigjet gjatë për vendimin e disiplinës që e dënoi fushën e Flamurtarit me 4 ndeshje pa tifozë, duke u përqëndruar te situata në skuadrën e tij edhe pse nuk ngurron të shkëpusë disa fjali.
“Dy ditë para ndeshjes nuk është pozitiv ky dënim. Këtu po bëj vitin dhe tani u mësuam me dënime të tilla të njëpasnjëshme. Kam besim se do t’ia dalim si sezonin e kaluar”.
Një ndeshje e veçantë për Duron ajo ndaj Partizanit dhe trajneri kryeqytetas e pranon që do të jetë një sfidë që përçon kujtime edhe pse mbetet i përqëndruar maksimalisht te ecuria e Flamurtarit.
Skuadra është e plotë dhe gjendja fizike optimale, Duro shpreson që ekipi të japë gjithçka në fushën e blertë. Deri në këtë pikë të sezonit, Flamurtari ka arritur të bindë në ndeshjet jashtë fushës dhe trajneri shpreson që ky trend të vazhdojë.
