Egnatia zyrtarizon holandezin Valpoort, Partizani firmos me 18-vjeçarin Hodo
Aventura e sulmuesit holandez Arsenio Valpoort te Teuta zgjati vetëm dy javë, pasi stafi teknik i durrsakëve nuk mbeti i kënaqur nga performanca e 28-vjeçarit dhe bashkëpunimi u ndërpre përpara kohe.
Megjithatë sulmuesi që ka një CV të pasur, do të vijojë të mbetet në Kategorinë Superiore, pasi ka arritur marrëveshjen me skuadrën e sapo-ngjitur, Egnatian dhe është prezantuar zyrtarisht në klubin rrogozhinas, që do të debutojë këtë sezon në elitën e futbollit shqiptar.
Valpoort ka veshur fanellat e skuadrave si Excelsior, Ferencvaros, Herenveen, Dordrecht, Almere dhe Emmen, ndërsa tani do të vërë eksperiencën e tij në dispozicion të klubit të Egnatias, ku do t’i duhet të udhëheqë repartin e avancuar.
Krahas 28-vjeçarit holandez, klubi nga Rrogozhina ka firmosur edhe me Aleandro Dakën dhe Petro Silidhis, dy futbollistë të rinj të talentuar, që shihen si elementë mjaft të rëndësishëm për të ardhmen e ekipit.
Ka lëvizur në merkato edhe partizani, që ka firmosur me 18-vjeçarin Xhafer Hodo. Ky i fundit është mesfushor me tipare sulmuese dhe shihet si element me mjaft perspektivë, ndaj ka firmosur për tre sezone me të kuqtë.
