Emirates Stadium, është një super stadium por edhe një strehë për minjtë!
Është padyshim një prej stadiumeve më sugjestionues e më të bukur të botës por fatkeqësisht aspak në mënyrë figurative, është pushtuar nga minjtë. Bëhet fjalë për Emirates Stadium, shtëpinë e Arsenalit, topçinjve të Londrës që prej kohësh është kthyer edhe në shtëpinë e kolonizatorëve brejtës. Ashtu siç raporton Daily Mail, disa muaj më parë gjatë një kontrolli të higjenës është ngritur problemi madhor që po vë jo pak në vështirësi klubin anglez. Inspektorët e higjenës kanë zbuluar praninë e minjve në ambientet kryesore të stadiumit. Arsenali ka dalë më një komunikatë ku lajmëron se do të marrë të gjitha masat e nevojshme për zgjidhjen e këtij problemi në mënyrë urgjente, por sigurisht që tashmë autoritetet kanë programuar edhe inspektime të tjera për të parë mbarëvajtjen e operacionit, largim i minjve. I inaguruar në vitin 2006, ndërtimi i këtij stadiumi kushtoi më shumë se 400 milionë euro, duke e kthyer këtë arenë përgjatë viteve të fundit në një nga atraksionet më të mëdha turistike të Londrës pavarësisht çmimit shumë të lartë të biletave për të ndjekur takimet e Arsenalit në shtëpinë e tyre që paradoksalisht ka lënë të lirë hyrjen për miqtë e paftuar. Sa komike aq edhe me nota ironike situata që ka përfshirë një prej stadiumeve më të kushtueshëm në botë.
