Gattuso: Fitore mentaliteti dhe sakrifice
Genaro Gattuso debutoi me fitore në takimin e tij të parë si trajner, në stadiumin ‘San Siro’, ku ka triumfuar shumë herë edhe si futbollist. Milani mposhti Bolognën me rezultatin 2-1, në një takim ku deçiziv ishte Bonaventura me 2 golat e tij.
“Bonaventura është një nga mesfushorët më të mirë dhe mund të luaj për çdo lloj skuadre. Ai është i aftë të luajë në disa pozicione të fushës dhe mbi të gjitha, të nxjerrë skuadrën nga momentet e vështira. Edhe sot e tregoi veten me 2 gola mjaft të rëndësishëm”, tha trajneri i Milanit.
Gattuso vlerësoi triumfin ndaj Bolognës si fitore të sakrificës, ndërsa bëri thirrje për përqendrim dhe punë, për të vijuar në këtë rrugë.
“Kjo ishte një fitore e mentalitetit dhe sakrificës. Sigurisht që vuajtëm, por kishim nevojë për një fitore të tillë. Duhet të përmirësohemi akoma, sidomos në prapavijë, ku shpesh gjendemi të papërgatitur, por e rëndësishme është që të vijojmë në këtë rrugë, me të tjera fitore”, u shpreh Genaro Gattuso.
