Gjoni: Ta nisim me trofe, nuk i trembemi Skënderbeut
Me profesion është mbrojtës. Në sezonin e fundit ishte një prej pikave më të forta të Laçit, por përpara finales me Skënderbeun, Eglentin Gjoni del nga roli dhe hidhet në sulm. 25-vjeçari kërkon të fitojë trofeun e dytë me fanellën e Laçit, që për koincidencë është Superkupa e Shqipërisë.
Jemi totalisht gati. Shpresojn ta nisim me trofe.
Gjoni nuk i trembet një rivali me emër dhe lojtarë cilësorë si Skënderbeu. Përkundrazi, ai premton luftë.
Jo Skënderbeun, por asnjë ekip tjetër nuk e kemi frikë. Do të luftojmë drejt objektivit.
Gjoni e ka të qartë se triumfi në Superkupë nuk do të shërbente vetëm për lavdi, por edhe për vazhdimësinë e skuadrës në sezonin e ri, për të synuar që të bëjnë më mirë se edicionin e kaluar.
Nisja e sezonit me trofe krijon besim te lojtarët, te stafi, tek të gjithë ne.
I mësuar gjithmonë të dalë në ndihmë të sulmit, shtatlarti Gjoni është një prej lojtarëve që mund të vendosë ndeshjen në episode të caktuara. Goli në finale do të ishte i mirëpritur, edhe pse prioritet për mbrojtësin ka skuadra.
Nuk është e rëndësishme kush shënon, por të fitojë ekipi.
