Godet sërish Teuta, zyrtarizon sulmuesin e njohur shkodran
Teuta vijon të përforcohet në merkato, teksa vetëm pak minuta më parë, ka zyrtarizuar një tjetër emër mjaft të njohur të futbolli shqiptar.
Bëhet fjalë për sulmuesin shkodran Armando Vajushi, i cili vjen pas një eksperience të madhe në kampionatin bullgar, por edhe në Serinë B italiane.
Sulmuesi 27-vjeçar ka luajtur në Shqipëri më herët me Vllazninë e Shkodrës, ndërsa më pas u transferua te Litexi në Bullgari.
Në vitin 2015 kartoni i Vajushit u ble nga skuadra e Chievos dhe që atëherë sulmuesi ka luajtur si i huazuar në skuadra të Serisë B si Livorno, Pro Vercelli dhe së fundi Avellino.
Me këtë afrim, shtohet komoditeti i trajnerit Blendi Shkëmbi, që tashmë ka gjithçka i duhet për të synuar diçka më tepër sesa thjesht një vend në kupat e Europës.
