Helmimi i Rui Costa prishi gjithçka, United u tërbua dhe hoqi dorë nga Nunez
Garën për Darwin Nunez e fitoi Liverpooli. “The Reds” arritën akordin me Benfikën në lidhje me sulmuesin uruguaian mbi bazën e 100 milionë euro (75+25 në formë bonusesh).
Përforcim fantastik për skuadrën e Jurgen Klopp, teksa 22-vjeçari do të firmosë për 5 vite me nënkampionët e Evropës. Për të pati interesim konkret edhe nga Manchester United.
Drejtuesit e “Djajve të Kuq” kishin programuar një takim me Manuel Rui Costa-n, presidentin e Benfikës, në fundin e muajit mars, me synimin për të siguruar një marrëveshje në lidhje me lojtarin e talentuar.
Ish-mesfushori i madh portugez, festoi 50-vjetorin e lindjes më 29 mars. Gjatë festës ai dhe familjarët e tij pësuan helmim nga ushqimi, duke mos marrë dot pjesë në takimin me drejtuesit anglezë.
Prapaskenë e zbulon The Athletic, ndërkohë që tek United u ndjenë të nënçmuar dhe të ofenduar nga mungesa e Rui Costës, dhe vendosën të tërhiqen nga gara për Nunez.
Sigurisht që sot janë penduar, sidomos pasi kanë marrë vesh pamundësinë e Rui Costa-s për të qenë në takimin e programuar, aq më tepër prej faktit që bomberi latin do të veshë fanellën e “armiqve” të përjetshëm të Liverpoolit.
