Immobile ‘përmbys’ Juventusin, shqiptarët makth për Dybalën
Ciro Immobile është padiskutim futbollisti më i mirë i Serisë A, në këto 8 javë të para, me plot 11 gola të shënuar. Italiani ka shtangur Juventusin, teksa ka shënuar 2 herë brenda 7 minutave dhe i ka dhënë Lazios 3 pikët në Torino. Juventusi kaloi në avantazh në minutën e 24-t, me anë të Douglas Costës, i cili shfrytëzoi më së miri një grushtim të portierit shqiptar Thomas Strakosha.
Në fillimin e pjesës së dytë fillon ‘Immobile show’, me sulmuesin e Lazios që barazon shifrat në minutën e 47-të, pas një kombinimi të bukur me Luis Alberton. 7 minuta më pas, Immobile futet në zonë dhe fiton një 11 metërsh, të cilin e kthen në gol po vetë, duke vulosur rezultatin 1-2. Në minutën e 6-të shtesë, Juventusi fitoi një penallti, të cilën e ekzekutoi Dybala, por e priti mjeshtërisht Strakosha. Portierët e kombëtares shqiptare duket se janë kthyer në makth për Dybalanë, sepse dy javë më parë, ishte Berisha që i priti 11 metërshin në minutat e fundit të ndeshjes.
Me këtë fitore, Lazio ngjitet në vendin e 4-t, me 19 pikë, po aq sa kanë edhe Inter e Juventus. Bardhekaltrit janë duke kaluar një formë të shkëlqyer, të udhëhequr nga golat e Immobiles dhe siguria në portë e portierit Strakosha, i cili edhe sot u bë hero me ndërhyrjet e tij shpëtimtare dhe penalltinë e pritur në shtesë. Nga ana tjetër, Juventusi pëson humbjen e parë në kampionat, fill pas barazimit në transfertën ndaj Atalantës, ndërsa rrezikon të shkëputet shumë nga kreu, nëse Napoli fiton sonte ndaj Romës.
