“Ish”-i i Laçit rikthehet në shtëpi: Realizova ëndrrën e vjetër, kam një premtim për tifozët
Bashkim Velija nuk ka humbur kohë për të gjetur ekipin e ri në karrierë. Anësori i djathtë nga Tetova (luan në dy krahët) ishte pjesë e Laçit sezonin e kaluar, duke veshur 44 herë fanellën e bardhezinjve mes kampionatit, Kupës së Shqipërisë dhe Conference League.
28-vjeçari është rikthyer në shtëpi, duke firmosur për dy vite me Shkëndijën e Tetovës. Kuqezinjtë ka zyrtarizuar afrimin e Velijës, i cili u shpreh i lumtur për transferimin te Shkëndija.
“Shkëndija angazhon përforcim mjaft cilësor në repartin e mbrojtjes. Bëhet fjalë për mbrojtësin e djathtë, 28 vjeçarin Bashkim Velija, i cili me klubin tonë ka nënshkruar kontratë me kohëzgjatje prej dy vitesh.
Bashkim Velija së fundmi ka qenë pjesë e skuadrës së Laçit nga Republika e Shqipërisë, ndërsa paraprakisht për disa sezone radhazi ka luajtur për ekipin e Renovës”, shkruan klubi shqiptar që garon në kampionatin e Maqedonisë së Veriut.
“Jam tepër i lumtur që sot bëhem pjesë e Shkëndijës. Ka qenë dëshirë e imja e kahmotshme që një ditë të luaj për Shkëndijën. Ajo që më shumë gëzon është se Shkëndija është duke krijuar një ekip cilësor dhe jam i lumtur që edhe unë do të jem pjesë e ekipit që pritet këtë vit të shënojë sukseset e radhës në garat evropiane.
Unë i falënderoj drejtuesit e klubit që ma dhanë këtë mundësi. Jam lojtar që në fushën e gjelbër gjithmonë e jap maksimumin dhe ju premtoj të gjithëve se do t’i përkushtohem maksimalisht fanellës kuqezi”, deklaroi Velija pas nënshkrimit të kontratës”, deklaroi Velija.
