Kapitullon Italia, mbetet jashtë Botërorit
Italia mbetet jashtë botërorit ‘Rusi 2018’, pasi nuk arriti të përmbysë humbjen e pësuar në Suedi. Këtë herë është pikërisht kombëtarja suedeze, që siguron kualifikimin për në kampionatin botëror dhe lë jashtë pikërisht italianët, për herë të dytë në histori, pas ‘Suedi 1958’. Skuadra e Venturës bëri gjithçka, por vetëm atë më të rëndësishmin, golin nuk arriti ta shënojë.
Pjesa e parë ishte me mjaft ritëm, teksa dallohej qartë tensioni i lartë që karakterizonte skuadrën e Venturës. Gjyqtari i takimit ndëshkoi disa futbollistë për protesta dhe tentoi të marrë nën kontroll sfidën, ndërsa suedezët kanë pretenduar 2 herë për prekje të topit me dorë nga ana e mbrojtësve italianë, brenda zonës së rreptësisë.
Edhe Italisë iu mohua një penallti, pas një ndërhyrjeje të gabuar në dëm të mesfushorit të Lazios, Parolo, brenda zonës së rreptësisë, por gjyqtari nuk ishte i këtij mendimi. Vlen të përmendet sakrifica e Bonuccit, që krahas maskës për hundën e thyer, pësoi edhe një dëmtim në gju, por preferoi të luajë duke çaluar, ndërsa refuzoi zëvendësimin. Në 10 minutat e fundit, Italia arriti të shtojë presionin në zonën e suedezëve, teksa goditi 3-4 herë në drejtim të portës, por pa arritur të gjejë avantazhin.
Edhe pjesa e dytë pati të njëjtën tablo, teksa presioni i lartë bënte që italianët të gabonin edhe zgjedhjet e thjeshta. As ndryshimet e bëra nga trajneri Ventura, madje as flakja e maskës mbrojtëse nga Bonucci, nuk solli golin e shumëpritur për italianët. 5 minutat e fundit, Italia u hodh e tëra në sulm dhe krijoi disa mundësi të mira, por fillimisht ishte portieri suedez që ndali goditjen e El Sharawit dhe më pas Parolo goditi jashtë një krosim të mirë të Florenzit.
Përfundon 0-0 dhe Italia, mbetët jashtë kompeticionit më të rëndësishëm sportiv të globit, kampionatit botëror ‘Rusi 2018’. Nga ana tjetër, Suedia pret biletën për në Rusi dhe konfirmohet si ‘macja e zezë’ e italianëve.
