Italia do fitoren në Shkodër për vazon e parë në play off
Italia ka një arsye shumë të fortë për të kërkuar fitoren në “Loro Borici” ndaj Shqipërisë, edhe pse tri pikët me kuqezinjtë nuk do t’i vlenin asgjë sa i përket renditjes në grup, ku skuadra e Venturës është blinduar në vendin e dytë. “Të kaltrit” rrezikojnë të zbresin në vazon e dytë në shortin e play off-it nëse nuk fitojnë në Shkodër (kuptohet edhe në varësi të rezultateve të skuadrave që do të renditen të dytat në grupet respektive) dhe ky do të ishte një gabim i madh.
Për këtë arsye, kush mendon se Shqipëria ka avantazh faktin që Italisë nuk i rrezikohet pjesëmarrja në play off dhe mund të mos angazhohet maksimalisht, gabohet rëndë.
Pas përditësimit të renditjes së UEFA-s dhe në bazë të renditjes aktuale në grupe, në vazon e parë në short do të jenë Portugalia, Italia, Uellsi dhe Danimarka, ndërsa në të dytën Kroacia, Irlanda e Veriut, Suedia dhe Greqia.
Përfaqësuesja Italiane po kalon një moment të vështirë dhe vetëm një fitore me Shqipërinë mund të kthejë sadopak humorin në kampin e kaltër.
