Java 15 vendos rekordin e golave, 18 realizime në 5 sfida
Java 15 e Kategorisë Superiore nuk është kursyer duke sjell rekordin e golave në një javë të vetme. Plot 18 realizime në 5 ndeshjet e javës kanë bërë që të thyhet rekordi i vendosur në javën e 6 me 16 gola të shënuar. Vetëm në Vlorë, në sfidën e luajtur në harkun e dy ditëve për shkak të kushteve të këqija atmosferike, është shënuar një gol që i ka dhënë fitoren Laçit ndaj kuqezinjve, por pavarësisht kësaj rekordi është vendosur nga goleadat në sfidat e tjera. Sinjali se kjo do të ishte një javë e destinuar për të dhuruar gola u duke që në dy ndeshjet e para, në Shkodër u tundën plot 5 herë rrjetat në fitoren 3-2 të Vllaznisë ndaj Kamzës, ndërsa në Lushnjë 4 golat e sfidës Lushnja-Skënderbeu bënë që në vetëm 180 minuta të ishin plot 9 realizime. Në sinkron me sfidat e së shtunës kanë ecur edhe dy duelet e së dielës. Luftëtari shpoi plot 5 herë portën e Partizanit në suksesin historik ndaj të kuqve, ndërsa në Durrës 3 golat e sfidës Teuta – Kukësi mbyllën llogaritë e kësaj jave. 18 golat janë një dhuratë për fundvit që skuadrat i kanë bërë tifozëve dhe kampionatit, duke dhënë sinjalet për një ecuri akoma më të mirë të këtij kampionati.
