Java e 7-të nis me 3 sfida, Feronikeli dhe Llapi me duele të lehta
Java e 7-të e Ipko Superligës së Kosovës nis këtë të shtunë, me 3 sfida që kanë favorite absolute skuadrat vendase për të marrë tre pikët. Në pritje të derbit të Anamoravës mes Gjilanit dhe Dritës, në orën 13:00 Feronikeli do të përpiqet të ruajë kreun duke fituar takimin ndaj Ferizaj në Drenas. Kampionët në fuqi kanë fituar 3 ndeshjet që kanë zhvilluar në shtëpi në këtë sezon dhe sot pritet tre pikët e radhës nga Feronikeli. Ndeshje akoma më të lehtë në letër ka Llapi që pret në Podujevë, Dukagjinin e vendit të fundit që pak shanse për të marrë pikë në këtë transfertë duke parë ecurinë e tyre në 6 javët e para. Llapi-Dukagjini do të startojë në orën 14:00 dhe gjithashtu do të transmetohet live në Supersport. Dita e shtunë e Ipko Superligës së Kosovës do të mbyllet me duelin e orës 15:00 që do të zhvillohet në Mitrovicë mes Trepça ’89 dhe Flamurtarit, një sfidë në të cilën bardhëjeshilët do të kërkojnë të rikthehen te fitorja.
