Kategoria e Dytë/ Lojtarët dhe stafi i Këlcyrës, dhunë barbare ndaj arbitrit
Fundjava riktheu dhunën në Kategorinë e Dytë, aktivitet që vijon të mbetet mjaft problematik në futbollin shqiptar. Ngjarja më e fundit ka ndodhur në ndeshjen Përmeti-Këlcyra.
Futbollistët dhe stafi i Këlcyrës ushtruan dhunë ndaj arbitrit Albi Paço, pasi ky i fundit akordoi 11-metërsh në favor të ekipit vendas, për prekje të topit me dorë në minutat e fundit.
Pamjet tregojnë qartë dy futbollistë që vijnë jashtë fushës, të cilët nisën dhunën ndaj gjyqtarit. I pari me bluzë të kuqe, dhe pas tij një tjetër lojtar i cili e kishte hequr fanellën.
Dhuna barbare vazhdoi me gjithë tentativat e disa lojtarëve vendas, por edhe të forcave të policisë për të mbrojtur arbitrin. Në disa fragmente të videos gjyqtari shihet i shembur në tokë, ndërsa shkelmat dhe grushtet ndaj tij vazhduan.
Në momentin kur policia arriti ta largonte arbitrin kryesor nga lojtarët dhunues, gjyqtarët u futën në dhomat e zhveshjes për të mos dalë më, me ndeshjen që u ndërpre në minutën e 82-të. Për klubin dhe lojtarët e Këlcyrës të përfshirë në dhunë do të merret vendim nga Komisionit të Disiplinës, ku masat priten mjaft të ashpra.
