Kolarov rinovon me Interin, Joao Mario një hap larg Benficës
Ditë “të nxehta” merkatoje në klubin e Interit, që sapo ka konkretizuar shitjen e Achraf Hakimit te PSG për një shifër totale prej rreth 70 milionë eurosh, me marokenin që ka kryer vizitat mjekësore paraditen e sotme dhe pritet të hedhë firmën mbi kontratë.
Në të njëjtën kohë në Milano kanë konfirmuar edhe për sezonin e ardhshëm mbrojtësin serb Aleksander Kolarov, i cili ka firmosur kontratën e re me zikaltrit, duke pranuar një reduktim të ndjeshëm edhe të pagës vjetore.
Ndërkohë në zyrat e klubit zikaltër ka mbërritur edhe menaxheri i Joao Marios, bashkë me disa drejtues të Benficës, për të zgjidhur edhe detajet e fundit të transferimit të fantazistit te klubi portugez.
Benfica ka bërë një ofertë prej 7.5 milionë eurosh, duke kënaqur pretendimet e klubit zikaltër, teksa edhe vetë Joao Mario ka dhënë miratimin për këtë transferim, ndaj së shpejti pritet të ketë “tym të bardhë” për këtë operacion.
