“Kushton 60 milionë €”/ Sakrifica e radhës, Interi nxjerr në merkato titullarin
Interi duhet të bëjë një tjetër sakrificë në merkaton e verës. Vitin e kaluar zikaltrit hoqën dorë nga Achraf Hakimi dhe Romelu Lukaku për të rregulluar bilancet. Sivjet pritet të largohet Alessandro Bastoni, edhe pse Simone Inzaghi e cilëson tepër të rëndësishëm lojtarin italian.
Drejtuesit e Interit e vlerësojnë 60 milionë euro qendërmbrojtësin 23-vjeçar. Tre janë klubet e interesuara për lojtarin e kombëtares italiane. Bayern Munchen, Manchester City dhe Tottenham kanë nisur bisedimet me Tulio Tinti, menaxherin e Bastonit.
Ndërkohë, Interi po tenton të afrojë një tjetër lojtar me parametra zero, diçka që është bërë rutinë në vitet e fundit. Ai është Henrikh Mkhitaryan. 33-vjeçari armen del lojtar i lirë në fund të sezonit.
Roma po tenton ta mbajë sërish në kryeqytet, Jose Mourinho e vlerëson, teksa drejtori sportiv, Tiago Pinto, mohoi kalimin e mesfushorit fantazisti tek ekipi i Inzaghit: “E njoh mirë Mkhitaryan, 100%, kështu që e di që janë gënjeshtra çfarë flitet për të.
Ai nuk po bisedon me Interin”. Gjithsesi, drejtuesit e klubit nga Milano kanë gati një ofertë 2-vjeçare për ish-lojtarin e Arsenalit dhe Dortmundit, dhe një pagë sezonale prej 4 milionë eurosh në sezon.
