Laçi, 2019-ta ka nisur ters, asnjë gol në tre takime!
Laçi ka humbur busullën duke e nisur në mënyrën më të keqe vitin 2019-të. Skuadra e cila pritej t’i jepte një shkundje këtij kampionati ka zhgënjyer në 3 daljet e para zyrtare, pasi nuk ka mundur të shënojë asnjë gol. Gjithçka nisi me atë humbje 0-2 në Kupë ndaj Bylisit edhe pse u mendua që ishte thjesht një rastësi. Ekipi nuk ishte kompletuar pasi afrimet e janarit nuk ishin bashkuar ende me skuadrën. Në një situatë të tillë gjithçka ishte e justifikueshme, por tashmë kur janë luajtur edhe dy ndeshjet e para të kampionatit bien këmbanat e alarmit për kurbinasit.
Ndaj Kukësit në transfertën e Kamzës bardhezinjtë iu kënaqën pa masë barazimit pa gola, duke e cilësuar një rezultat të pranueshëm me një prej rivalëve për titull. Në letër kjo javë ofronte një mundësi për t’iu rikthyer suksesit por që në të vërtetë nuk rezultoi e tillë. Ndaj Luftëtarit skuadra nuk bëri asgjë, diçka që e pranoi edhe vetë trajneri Besnik Prenga pas përfundimit të takimit. 270 minuta dhe asnjë gol i shënuar është një shifër që nuk i shkon për shtat Laçit, që 2018-ta e mbylli me dy rezultate pozitive, fitore në shtëpi ndaj Tiranës dhe barazimi në transfertë me Teutën, një tjetër pretendente për zonën e sipërme të klasifikimit. Edhe në lojë kjo skuadër duket shumë larg asaj që kemi parë vitin e shkuar dhe tashmë detyra e trajnerit Prenga është të rikthejë besimin tek grupi, ndërkohë që dy sulmuesit e afruar në orët e fundit të merkatos duhet të përshtaten sa më shpejt me ekipin për të nxjerrë Laçin nga kjo situatë.
