Lajm i keq për Flick, mbrojtësi dëmtohet dhe largohet nga grumbullimi
Hansi Flick debutoi në pankinën e Gjermanisë me një fitore 0-2 në transfertën ndaj Liechtensteinit, megjithatë dëmtimi i mbrojtësit të majtë Robin Gosens ishte e vetmja notë negative e mbrëmjes.
Futbollisti mori një goditje në këmbën e majtë dhe la fushën e lojës para kohe për t’iu drejtuar dhomave të zhveshjes, ndërsa tekniku gjerman i kishte konsumuar të gjithë zëvendësimet dhe “panzerat” luajtën për pak minuta me një lojtar më pak.
Dëmtimi i Gosens duket se është më serioz nga sa u mendua, ndaj futbollisti u largua nga grumbullimi i përfaqësueses për t’iu nënshtruar ekzaminimeve shtesë, që do të përcaktojnë edhe kohën e rikuperimit.
Momentalisht askush nga përfaqësuesja gjermane nuk ka dhënë informacione mbi shkallën e dëmtimit, megjithatë e sigurt është që Gosens nuk do të jetë në dispozicion të Flick për sfidat ndaj Armenisë e Islandës.
